Saorchló GC

Saorchló GC

Tá Saorchló GC bunaithe go scaoilte ar an gcló a bhíodh le feiceáil ar bhoinn airgid Shaorstát Éireann, boinn a eisíodh don chéad uair sa bhliain 1928 agus a bhí in úsáid anuas go dtí an bhliain 1971 nuair a cuireadh tús leis an gcóras deachúil (féach thíos). Dealbhóir Sasanach darbh ainm Percy Metcalfe a dhear na boinn agus is dócha gurb eisean a dhear na litreacha orthu freisin. D'fheicfeá corr-bhonn a raibh 'scilling' nó 'flóirín' scríofa air chomh fada is a mhair an punt Éireannach ach an t-aon iarsma den chló atá fágtha anois ná an focal 'Éire' ar chúl bhoinn an euro. Is litreacha nua-dheartha iad 'b', 'd', 'h' agus 'm' - litreacha nár úsáideadh ar na boinn - agus na litreacha breise nach raibh gá leo in aibítir stairiúil na Gaeilge.

Cló ornáideach is ea Saorchló GC go príomha, ach d'fhéadfaí é a úsáid le haghaidh na gceannteideal i dtéacs freisin.

Tá an cló seo códaithe de réir Unicode. Is féidir sampla de théacs a clóbhuaileadh leis an gcló seo a léamh má tá Acrobat Reader ar do ríomhaire agat.

Tá Saorchló GC, leagan 3.01, le fáil saor in aisce ach teachtaireacht á iarraidh a chur go dtí an seoladh ríomhphoist seo a leanas:
seoladh ríomhphoist
Bíodh 'Saorchló' luaite mar cheannteideal ar an teachtaireacht. Níor mhiste iarratas eile a dhéanamh muna bhfaightear freagra laistigh de sheachtain.