Caraċtair ṁalartaċa

Tá malairtí stíle (stylistic alternates), nasclitreacha (ligatures), agus malairtí comhthéacsúla (contextual alternates) le fáil i roinnt de na clónna i gcnuasach Ghaelchló agus beimid ag cur lena líon de réir a chéile.

Má tá malairtí stíle (stylistic alternates) le fáil i gcló, beifear in ann tacar stíle (stylistic set) a roghnú chun cruth éagsúil a chur ar litreacha áirithe sa chló sin. Mar shampla, d'fhéadfaí tacar stíle ar leith a roghnú chun litreacha inseacha ('ɼ', 'ſ', 'ẛ') a chur isteach in ionad na litreacha atá réamhshocraithe ('r', 's', 'ṡ').

Má tá nasclitreacha (ligatures) le fáil i gcló, cuirfear carachtar amháin isteach in ionad dhá charachtar má tá nasclitreacha in úsáid. Mar shampla, d'fhéadfaí an nasclitir 'æ' a chur isteach in ionad na litreacha 'ae'.

Má tá malairtí comhthéacsúla (contextual alternates) le fáil i gcló, athróidh cruth na gcarachtar de réir an chomhthéacs má roghnaíonn tú malairtí comhthéacsúla a úsáid. Mar shampla, d'fhéadfadh cruth éagsúil a bheith ar litir áirithe nuair a thagann sí ag deireadh focail seachas in aon áit eile.

Má tá na carachtair mhalartacha thuasluaite le fáil i gcló ar leith, beidh na sonraí go léir fúthu le léamh ar leathanach an chló sin. Chun teacht ar threoracha faoi úsáid na n-éifeachtaí seo i roinnt de na feidhmchláir is coitianta, roghnaigh an córas oibriúcháin atá in úsáid agat anseo thíos.

	Carachtair mhalartacha in MS Windows
	Carachtair mhalartacha in macOS
	Carachtair mhalartacha in Linux